聽講今年 「樂齡科技博覽暨高峰會2025」新加咗唔少對輪椅人士友善嘅科技產品，Rabi即刻話要嚟睇下。

首先就去咗今年新增嘅主題區「便便館」。除咗認識更加多腸道健康資訊，仲試用咗超強嘅智能馬桶！佢唔單止係座廁，仲可以即時分析大便數據，檢查腸道健康狀況，真係既私隱又方便！

之後去到「照護食樂園」，Rabi 發現咗一部3D食物打印機！無論係咩原材料，只要放入去，就可以印出賣相精緻、味道一流嘅餐點！

行咗無兩步，Rabi又比「AI智慧家居體驗館」入面嘅超大送藥無人機吸引住！想像吓未來唔洗出門，平安藥、急需藥物直接飛到屋企窗外。對 Rabi 嚟講，呢種科技真係大大減低咗出入醫院嘅勞累！

講到高科技又點會少得「國家創新科技長廊」，Rabi 試用咗專為輪椅人士設計嘅智能機械臂。以前高處拎唔到嘅嘢、或者重物，依家只要動動手指控制機械臂，就可以輕易拎到。呢種自主感，先係樂齡科技帶畀長者同殘疾人士最大嘅禮物！